نوشہرہ کے علاقے پلوشی میں ایک افسوسناک واقعہ پیش آیا، جہاں اٹلی سے پاکستان آنے والے تین سگے بھائیوں کو ان کے اپنے چچا اور کزنز نے قتل کر دیا۔ تینوں بھائی اپنے چھوٹے بھائی کی شادی میں شرکت کے لیے پاکستان آئے تھے، مگر یہ خوشی کا موقع ماتم میں بدل گیا۔
یہ واقعہ ازاخیل پولیس اسٹیشن کی حدود میں پیش آیا۔ پولیس کے مطابق ابتدائی تحقیقات میں یہ بات سامنے آئی ہے کہ خاندان کے درمیان پرانی جائیداد کا تنازعہ شدت اختیار کر گیا تھا۔ اسی تنازعے پر مشتعل ہو کر مقتولین کے چچا اور کزنز نے ان پر فائرنگ کر دی، جس سے تینوں بھائی موقع پر ہی جاں بحق ہو گئے۔
مزید جانیے.
اسلام آباد میں گدھوں کا گوشت پکڑا گیا.کیا ہم جو کھا رہے ہیں وہ واقعی حلال ہے؟
روبوٹک سرجری کا کمال! پاکستانی سرجن نے دبئی سے چین میں آپریشن کیا.
فائرنگ کے بعد ملزمان موقع واردات سے فرار ہو گئے، لیکن پولیس نے فوری کارروائی کرتے ہوئے سرچ آپریشن شروع کر دیا۔ دو ملزمان کو اس وقت گرفتار کر لیا گیا جب وہ رات کی تاریکی میں گھریلو سامان منتقل کرنے کی کوشش کر رہے تھے۔ پولیس نے ان کے قبضے سے واردات میں استعمال ہونے والا اسلحہ بھی برآمد کر لیا ہے۔ جبکہ تیسرے ملزم کی گرفتاری کے لیے چھاپے مارے جا رہے ہیں۔
یہ واقعہ صرف ایک خاندانی تنازعہ کا نتیجہ نہیں، بلکہ بیرون ملک سے آنے والے پاکستانیوں کے لیے ایک دردناک پیغام بھی ہے۔ جس گھر میں خوشیوں کی گونج ہونی تھی، وہاں اب صرف خاموشی اور دکھ کا راج ہے۔ اٹلی میں مقیم پاکستانی برادری بھی اس دل دہلا دینے والے سانحے پر شدید غم میں مبتلا ہے۔
پولیس کا کہنا ہے کہ کیس کی مزید تحقیقات جاری ہیں اور جلد باقی ماندہ ملزم کو بھی گرفتار کر لیا جائے گا تاکہ متاثرہ خاندان کو انصاف مل سکے۔